صعبة الجبان ظلك هسة يتعداك

اخوكم علي عزيز





سولف يا كلب بسك حجي البسكوت
سمعني احس سكتاتك طويله




تعبني الصبر شترجه عود يصير
وشحصل بدر من هم شناشيله


صح لولة الصبر ما طاب جرح ايوب
بس صبر النبي من يكدر يشيله


صعبة الجان ضلك هسة يتعداك
وجبيره اليشتكيلك هسة تشكيله


وذله اليشتهي ترابك يدوس عليك
وهضيمه المايجيلك انته تمشيله


يا صبر الشمس يسحك عليهه اليل
وتموت العصر والفجر تحييله


ما تنشف الكصتة من العرك نهران
وما توكع النكطه شما تهفيله


ثكيلة النكطه من توكع ولا تنشال
بس ممكن جبل من يوكع تشيله


سولف يا كلب منك صبر ماريد
سهران الخلك خل يسمع احجيله


اريدن شهرزادك ما تضوك النوم
وليله تصير اريدن من الف ليله


ليش الي تحبة يصير الك دفان
ينبش من وراك وانته تبنيله


علمني الزمن موت الدمع بالعيد
وعاشور اليمرني عيوني ابديله


والليل اعله حك لو تعباه العوز
.. والينوخذ حكة تلوكله الشيله


وبس هاي الزمن ما نصح بيهه وياي
ما عد الزلم لمن سرج خيله


حط اعنانهن بيد الردي يا حيف
والجربه صهلت والسكتت اكحيله


ولا تهاب اليجيك وطبعه طبع الجام
بس هاب اليجي وحيل الزلم حيله


ولا يغرك العكرب اعمة من الراس
ما يحمل بله بس البله بذيله


وتتجه على جفك لو طحت وتكوم
بس لو طاح جفك من يتجيله


كون الراح يرجع هسه حته يشوف
انسان اليذلنه شلون ندعيله


الهم ربي تفضحه بس بسكوت
نلفضهه دخيلك لا تعديله